Matapos ang ikalawang operasyon

MATAPOS ANG IKALAWANG OPERASYON 

nakita ko si misis sa operating room

bago lumabas upang madala sa kwarto

matapos gawin ang dalawang operasyon

habang si misis ay naroong nakatubo

mga doktor at nars inihatid na siya

upang doon ay pangalagaang totoo

paglabas sa O.R., sinabayan ko sila

habang may luhang nangingilid sa pisngi ko

una ay sa ulo siya inoperahan

nang dahil sa pamamaga ng kanyang utak

ikalawa'y tinanggal ang abscess sa tiyan

o malaking nana sa tiyan nagsitambak

unang operasyon, higit dalawang oras

ikalawa nama'y tatlong oras mahigit

matagal-tagal din bago pa makalabas

mahalaga'y lampasan ang buhay sa bingit

matagal pa ang laban ni misis, matagal

ngunit laban niya sana'y kanyang kayanin

ako'y naritong patuloy na nagmamahal

mabuhay lang siya, lahat aking gagawin

- gregoriovbituinjr.

04.08.2025

* naisulat bandang alauna y media ng hapon sa NeuroCritical Care Unit (NCCU), Abril 8, 2025

Tagumpay ang unang operasyon

TAGUMPAY ANG UNANG OPERASYON

nasa kantin ako ng ospital

nag-aabang doon ng balita

nang biglang tumunog itong selpon

ako'y pinababa na ng doktor

at nagtungo sa operating room

tapos na ang unang operasyon

matagumpay daw ang pagtitistis

ng mga doktor sa aking misis

subalit may kasunod pa iyon

sa tiyan pangalwang operasyon

ikalawa rin sana'y tagumpay 

ang pagtistis sa sinta kong tunay

nasa ospital pa akong sadya

muli'y nag-aabang ng balita

- gregoriovbituinjr.

04.08.2025

* naisulat bandang ikasampu't kalahati ng umaga sa kantina ng ospital, Abril 8, 2025

* decompressive hemicraniectomy ang tawag sa unang operasyong ginawa kay misis

Pag-shave ng buhok

PAG-SHAVE NG BUHOK

nagpaalam ang doktor sa akin kanina

ang buhok ni misis ay ise-shave raw nila

kalahati lamang ba o buong buhok na

dahil nga sa ulo sila mag-oopera

nang sinabing buong buhok, tumango ako

upang sabay pang tumubo ang mga ito

kailangan sa pag-oopera sa ulo

pag natapos, wala nang buhok si misis ko

mahalaga'y magtagumpay ang operasyon

saka ko iisipin ang gastusin doon

upang di ma-redtag sa ospital na iyon

na babayaran ay tiyak abot ng milyon

nawa'y tagumpay ang pag-opera kay misis

ang luha ko man sa pisngi'y dumadalisdis

- gregoriovbituinjr.

04.08.2025

* sinulat bandang ikaanim at kalahati ng umaga nang dinala na sa operating room si misis, Abril 4, 2025

Di pangkaraniwang araw

DI PANGKARANIWANG ARAW 

di pangkaraniwang araw ito

para sa akin, Abril a-otso

ngayon ang operasyon ni misis

sana'y tagumpay siyang matistis

ramdam ko ang kaba't pangangatal

parang may nakatarak na punyal

sa aking dibdib, na sumusugat

na tila baga di naaampat

animo'y nakaabang sa hangin

pagala-gala ang saloobin 

sana'y ligtas akong makauwi

sa kabila ng maraming hikbi

nawa'y tagumpay ang operasyon

iyan ang asam ko't nilalayon

nais kong si misis pa'y mabuhay

at magsama kami habang buhay

- gregoriovbituinjr.

04.08.2025

* sinulat bandang ikalima't kalahati ng umaga sa ospital, Abril 4, 2025

Biktima'y dalawang bata

BIKTIMA'Y DALAWANG BATA

sa magkaibang balita

biktima'y dalawang bata

imbes na kinakalinga

ay ginawan ng masama

edad dalawa, pinaslang

ng stepdad, puso'y halang

edad apat pa'y pinaslang

mga kawawang nilalang

nangyari'y bakit ganito

pinaslang silang totoo

ng mga hangal sa mundo

mental health problem ba ito

bata'y sa bugbog namatay

aba'y sinaksak pang tunay

isa'y ginulpi't kinagat

ganito'y di madalumat

Mental Health Act ba'y ano na?

may nagawa ba talaga?

nasabi ko lang: HUSTISYA

para sa mga biktima!

- gregoriovbituinjr.

04.07.2025

* ulat mula sa pahayagang Bulgar, Abril 6, 2025, tampok na balita (headline) at pahina 2

* Republic Act No. 11036 - An Act Establishing a National Mental Health Policy for the Purpose of Enhancing the Delivery of Integrated Mental Health Services, na mas kilala ring Mental Health Act of 2018

Tangi kong asam

TANGI KONG ASAM

tinitigan kita nang matagal

habang nakaratay sa ospital

hanggang ngayon ay natitigagal

loob ko'y di mapanatag, mahal

nakatitig sa iyong paghimbing

inaasam ko't tangi kong hiling

ay ang iyong agarang paggaling

upang kita'y muling makapiling

hinawakan ko ang iyong kamay

di mahigpit kundi malumanay

narito lang ako't nakabantay

bagamat di pa rin mapalagay

sana'y mapakinggan yaring samo

na muli ay magkasama tayo

hiling ko'y gumaling kang totoo

at mabigyang lunas ang sakit mo

- gregoriovbituinjr.

04.07.2025

Dalawang aklat na pumapaksa sa kalusugan

DALAWANG AKLAT NA PUMAPAKSA SA KALUSUGAN

Maikling sanaysay at tula ni Gregorio V. Bituin Jr.

Pagkagaling ko sa ospital kanina nang dinalaw ko si misis na nakaratay sa banig ng karamdaman, ako'y lumisan doon bandang tanghaliang tapat.

Mula sa ospital ay sumakay na ako ng dyip puntang Gateway sa Cubao. Naglakad hanggang makarating sa Book Sale sa gilid ng Fiesta Carnival. Pumasok ako doon at agad na bumungad sa akin ang aklat na "40 Days of Hope for Healthcare Heroes" ni Amy K. Sorrells, BSN, RN. Ang RN ay registered nurse.

Naintriga ako sa mga salitang "Healthcare Heroes" lalo na't nasa ospital si misis na pinangangalagaan ng mga doktor at nars.

Isa pang aklat ang nakatawag pansin sa akin dahil sa nakasulat na A. Molotkov Poems, at agad isinama ko sa binili dahil bilang makata, nais kong basahin ang mga tula ng di ko kilalang awtor. Pag-uwi ko na sa bahay, saka ko na napansin ang pamagat, "Future Symptoms". Batid kong ang salitang symptoms ay may kaugnayan sa health o kalusugan.

Sa blurb nga sa likod ng aklat na ito ay nakasulat: In this stirring collection of poetry, A. Molotkov considers a country on the brink of collapse, plagued by virus and violence, haunted by history, asking of himself - and us - "How do I move / with my love / caught in concrete... How do I sing with all / this past / in my lungs?" Muli, tinukoy sa blurb ang dalawang salita: virus at lungs, na tumutukoy sa kalusugan at paghinga ng tao.

Ang "40 Days of Hope for Healthcare Heroes", may sukat na 5" x 7", at naglalaman ng 176 pahina (12 ang naka-Roman numeral), ay nagkakahalaga ng P130 habang ang "Future Symptoms: A. Molotkov Poems", may sukat na 6" x 9", at naglalaman ng 118 pahina, ay nagkakahalaga naman ng P70. Kaya bale P200 silang dalawa.

Marahil nga'y di ko bibilhin ang dalawang libro kung malakas si misis at wala sa ospital. Subalit nahikayat akong bilhin dahil sa kanyang kalagayan, at dahil na rin sa paksa hinggil sa kalusugan. Batid kong marami akong matututunan sa mga aklat na ito.

Nais ko silang basahin dahil sa isa na namang yugto sa buhay naming mag-asawa ang bumalik uli kami sa ospital. At ang mga librong ito'y tila ba nagbibigay sa akin ng pag-asa. Lalo na't noong panahon ng pandemya, maraming bayaning frontliners na dapat saluduhan.

pumapaksa nga sa kalusugan

ang dalawa kong nabiling aklat

na tagos sa puso ko't isipan

na talagang makapagmumulat

noong panahon pa ng pandemya

ang naririto nga'y pinapaksa

nars at doktor, bayani talaga

kinatha pa'y sanaysay at tula

bumulaga nga agad sa akin

sa Book Sale yaong nasabing libro

kaya di nag-atubiling bilhin

dagdag kaalaman pang totoo

"40 Days of Hope for Healthcare Heroes"

at "Future Symptoms: A. Molotkov Poems"

tiyak na maraming makakatas

pag binasa ko sa libreng oras

04.06.2025

Walang iwanan, O, aking sinta

WALANG IWANAN, O, AKING SINTA

ilang ulit na tayong naharap

sa anong tinding dagok ng palad

subalit tayo'y nagsusumikap

na pagsasama pa'y mapaunlad

sa altar noon tayo'y sumumpa

na walang iwanan, sa kabila

ng mga suliranin at sigwa

kasama sa hirap at ginhawa

tulad ngayon, nasa ospital ka

ginagawa ko ang lahat, sinta

ako ma'y naluluhang talaga

sa nangyayari sa iyo, sinta

di kita iiwan ang pangako

buong-buo ang aking pagsuyo

ang pag-ibig ko'y di maglalaho

sa problemang ito'y di susuko

sa pagsubok sana'y makalampas

sinta ko, ikaw ay magpalakas

mabibigyan ka ng tamang lunas

suliraning ito'y malulutas

- gregoriovbituinjr.

04.06.2025

Ang aklat para sa akin

ANG AKLAT PARA SA AKIN

pagbili ng libro'y nakahiligan
sa bookstore o mga book festival man
tungkol sa kasaysayan, pahayagan,
tula, kwento, sanaysay, panitikan

dahil ako'y makata, manunulat
ng mga tula't kwentong mapangmulat
na pampanitikan ang binubuklat
sari-saring akda'y binubulatlat

may dyaryong Taliba ng Maralita
kung saan kwento ko'y nalalathala
mga pahayag ng samahan, tula
na nais kong maisalibro din nga

balak kong makagawa ng nobela
hinggil sa pakikibaka ng masa
wawakasan ang bulok na sistema
wawakasan ang pagsasamantala

pangarap kong maisaaklat iyon
isa iyan sa dakila kong layon
na burgesya'y sa lupa maibaon
lipunang asam ay itayo ngayon

- gregoriovbituinjr.
04.05.2025

Coed, nagpatiwakal

COED, NAGPATIWAKAL

bakit naisip magpatiwakal?

ng isang coed sa paaralan

mula ikaapat na palapag

siya'y tumalon, anong dahilan?

iniwan ba siya ng kasuyo?

at labis niyang dinamdam iyon?

pagsinta ba sa kanya'y naglaho?

aba'y anong sakit naman niyon!

sa eksam ba'y mababa ang grado?

nahihiyang di makapagtapos?

may mental health problem kaya ito?

na problema'y di matapos-tapos?

nagpapakamatay na'y kayrami

pangyayaring ganito'y kaylupit

nadagdagan pa ng estudyante

kahit may batas na sa Mental Health

- gregoriovbituinjr.

04.05.2025

* ulat mula sa pahayagang Bulgar, Abril 5, 2025, p.2

* Republic Act No. 11036 - An Act Establishing a National Mental Health Policy for the Purpose of Enhancing the Delivery of Integrated Mental Health Services, na mas kilala ring Mental Health Act of 2018

Karahasan ng magulang sa mga anak

KARAHASAN NG MAGULANG SA MGA ANAK

sa dyaryong Bulgar, dalawang tampok na ulat

hinggil sa panggagahasa ng mismong tatay

sa mga anak, edad apat, labing-apat,

at labingsiyam, OFW ang nanay

edad siyam nama'y binubugaw ng ina

sa online, matatamong mo na lang ay bakit

dahil ba sa kahirapan ay gagawin na

upang magkapera'y ibubugaw ang paslit

sisisihin ba si Libog at Kahirapan

upang malusutan lang ang ginawang krimen

paglaki ng bata'y anong kahihinatnan

kung tatay mismo ang sa kanila'y umangkin

mapapaisip ka bakit ito nangyari

libog lang ba o may mental health problem ito

imbis mahalin, magulang mismo ang imbi

pag lumaki ang anak, kawawang totoo

- gregoriovbituinjr.

04.04.2025

* ulat mula sa pahayagang Bulgar, Abril 4, 2025, tampok na balita at pahina 2

Istrok

ISTROK

di na niya maigalaw ang kanang braso

di rin maigalaw ang kanang hita't binti

pinagpahinga muna hanggang mag-umaga

nang di pa maigalaw, nagpaospital na

may bleeding sa pagitan ng artery at vein

sa utak, kung dati, may blood clot sa bituka

na inoperahan upang dugo'y lumabnaw

ngayon, may blood clot namang namuo sa utak

pitumpung porsyento raw ang nakaliligtas

sa istrok na nangyari sa asawang sinta

nawa, ang nangyari'y malusutan ni misis

aktibistang Spartan ay ito ang nais

naluluha na lamang ang makatang ito

tulala sa kawalan, isip ay paano

makaligtas si misis sa nangyaring ito

nawa'y gumaling pa si misis, aking samo

- gregoriovbituinjr.

04.04.2025

* litratong kuha ng makatang gala sa isang ospital

Paglalakbay sa bingit

PAGLALAKBAY SA BINGIT

lumulutang yaring diwa

sa langit ng pang-unawa

ang nasa dambana'y tula

ang nasa dibdib ay luha

nilalakbay bawat bingit

ng kahapong di maukit

mga planong inuugit

sa puso'y inilalapit

ang tula'y nakabubusog

sa diwa kong nayuyugyog

ngunit nagkalasog-lasog

nang ilang ulit nauntog

wala man sa toreng garing

sa pagkatha'y buong giting

na ang madla'y ginigising

sa mahabang pagkahimbing

- gregoriovbituinjr.

04.02.2025

* kinatha sa ika-237 kaarawan ng makatang Francisco Balagtas

Ngayong Araw ni Balagtas, nais kong magpasalamat

NGAYONG ARAW NI BALAGTAS, NAIS KONG MAGPASALAMAT

ngayong Araw ni Balagtas, / nais kong magpasalamat

sa lahat ng mga tulong / sa oras ng kalituhan

nang maospital si misis / sa matinding karamdaman

pinaaabot ko'y taos / sa pusong pasasalamat

hindi ko man matularan / ang idolo kong makata

subalit para sa akin, / bawat kathang tula'y tulay

tungo sa pakikibakang / sa tuwina'y naninilay

lalo't isyu't paksa iyon / ng manggagawa't dalita

di pa mabuti si misis / bagamat pumapasok na

sa trabaho bilang social / worker sa kanilang opis

subalit ayon sa doktor, / rare case ang kaso ni misis

kaya pag-uwi ako'y nars, / at di pabaya sa kanya

kwarenta'y nwebeng araw nga / kami noon sa ospital

may tumulong, may inutang, / may isinanlang titulo

presyong tatlong milyong piso'y / di ko alam papaano

unti-unting babayaran, / presyong nakatitigagal

sa dalawang NGO nga'y / sinubukan kong mag-aplay

subalit di pa matanggap / ang tibak na laging kapos

ngayong Araw ni Balagtas, / pasasalamat ko'y taos

sa mga pusong dakila / sa tinulong nilang tunay

- gregoriovbituinjr.

04.02.2025

Nasisilaw sa ilaw

NASISILAW SA ILAW

nagtakip si alaga ng kamay

habang natutulog ng mahimbing

marahil nasisilaw sa ilaw

kaya kamay ay ipinantabing

mamaya, ako'y matutulog din

at ang ilaw ay io-off ko lang

isasara lang, di papatayin

mahirap ang salita ng tokhang

buti tulog ngayon si alaga

pagkat gabi ang kanyang trabaho

hanggang madaling araw gising nga

upang daga'y hulihing totoo

- gregoriovbituinjr.

04.01.2025

* mapapanood ang bidyo sa kawing na: https://www.facebook.com/share/v/1LAWQbT1c8/ 

Ang uod ay isang paruparo

ANG UOD AY ISANG PARUPARO

And just what the caterpillar thought her life was over, she began to fly. ~ Chuang Tzu

kaygandang talinghaga'y nabatid

na magandang payo sa sinumang

nahihirapan at nabubulid

sa dusang tila di makayanan

sino kaya ang nagsabi niyon

ng talinghagang tagos sa puso

si Chuang Tzu nang unang panahon

at isa sa Taoismo'y nagtayo

akala ng uod mamamatay

siya paglabas sa nakabalot

sa katawan, at nang magkamalay

ay naging paruparo ang uod

nakalipad na patungong langit

sa mga kampupot bumababa

noon ay laging minamaliit

ngayon kayganda, kamangha-mangha

tulad din ng ating suliranin

na animo'y di na malulutas

may buhay pa palang haharapin

tungo sa isang magandang bukas

- gregoriovbituinjr.

04.01.2025

* larawan mula sa google

Noli Me "Tangina"

NOLI ME "TANGINA"

si Rizal daw ang idolo ng ama

na hilig magtungayaw o magmura

inakda raw ay Noli Me "Tangina"

komiks na patama, kunwari'y kwela

sa biro, ako na lang ay natawa

iba rin talaga si Al Pedroche

na sinulat ay iba't ibang siste

nasa diwa'y gagawan ng diskarte

lalo't pasasaringan ay salbahe

isusulat anuman ang mangyari

meron bang El "Filibustanginamo"

sunod sa Noli Me "Tangina" nito

kawawa naman ang akda ni Lolo 

Pepe dahil sa biruang ganito

- gregoriovbituinjr.

04.01.2025

* tula batay sa komiks sa unang pahina ng Pilipino Star Ngayon, Marso 31, 2025

Lungad

LUNGAD

Labingtatlo Pahalang: Pagsuka ng sanggol

anim na titik, at ang lumabas na sagot:

LUNGAD, salitang ngayon ko lamang nasapol

bago lang sa akin ang katagang sumulpot

unang araw ng Abril, salita'y bumungad

madaling araw nang krosword ay masagutan

dyaryo'y kahapon pa, ngayon lamang nalantad

sa krosword ang bagong salitang kakaiba

sa wikang Ingles, infant reflux pala ito

iba sa suka, sapagkat kusang lalabas

sa bibig yaong gatas matapos sumuso

na karaniwan lang, ayon sa mga pantas

dagdag na salita itong magagamit din

sa pagkatha ng kwento, tula, at sanaysay

tila baga nalasap ay bagong pagkain

kaya bokabularyo'y nagiging makulay

- gregoriovbituinjr.

04.01.2025

* palaisipan mula sa pahayagang Bulgar, Marso 31, 2025, pahina 11

* https://ph.theasianparent.com/lungad 

* https://www.facebook.com/UnabellaMC/posts/madalas-bang-lumungad-si-baby-ang-paglungad-ng-sanggol-ay-madalas-na-ikinababaha/2355653711349118/ 

May mga pangalan ang mga pinaslang

MAY MGA PANGALAN ANG MGA PINASLANG

(Tara, pagtulungan natin upang mabatid ni VP Sara)

wala nga bang pangalan ang mga pinaslang?

tiyak meron, at maraming ina ang luhaan

subalit bigyan natin ng mga pangalan

upang ang bise, pangalan nila'y malaman

si Kian Delos Santos ay isa lang diyan

ina ni Aldrin Castillo nga'y lumuluha

na buhay ng kanyang anak ay iwinala

bagamat di naman ako nakapagtala

subalit ito'y isang hamon sa makata

sandaang ngalan ma'y masaliksik kong sadya

Jonathan Mulos, "Dagul", Dario Oquialda, 

JohnDy Maglinte, Obet Tington, Eugen Llaga, 

Vincent Adia, Carlo Bello Villagarcia, 

Abdulmahid Mamalumpong, Larry Miranda, 

Harriet Barrameda Serra, Noel Ababa,

Renato Cajelo Mariano, Alfredo 

Orpeza, "Yaba", Alfredo Roy Elgarico,

Jeremie Garcia, Emelito Mercado,

Harold Tablazon, Jordan Sabandal Abrigo, 

Basideles Ledon, Remar Caballero, 

Ricky Dinon, Noron Mulod, Larry Salaman,

Jocel Salas, Norman Sola, Victor Lawanan,

Abraham Damil, Christopher "Amping" Cuan, 

Joshua Evangelista, Hernani Tipanan,

Caesar Perez, Edwin Callos, Russel De Guzman,

Marcelo Baluyot, Aldrin Tangonan, Jr.,

Abubacar Sharief, Pablo Matinong Jr.,

Jose Dennis Dazer, Arsenio Guzman Jr.,

Joshua Laxamana, Ricardo Gapaz Jr.,

Antonio Rodriguez, Gener Amante Jr.,

Gilbert Paala, Daniel Lopez, Djastin Lopez,

Franie Genandoy Avanceña, Froilan Reyes,

Roselle Tolentino Javier, Ritchie De Asis, 

Louie Angelo Vallada, Santiago Andres,

Roberto Alejo Silva, Jun Rey Cabanez,

 

kung bibilangin ko'y higit pa lang limampu

ang sa tula'y ngalan ng buhay na naglaho

sa isang patakaran ngang napakadugo

sa paalam dot org pa lang ito nahango

halina't pagtulungang ngalan pa'y mabuo

* pinaghanguan ng mga pangalan ng biktima ng drug war: https://paalam.org/ 

* tula batay sa ulat sa pahayagang Bulgar, Marso 31, 2025, tampok na balita (headline) at pahina 2

Walang gutom ang Budol Gang

WALANG GUTOM ANG BUDOL GANG

ang budol ay

panloloko,

panlalansi,

panlilinlang

gamit nila'y 

anong tamis

maasukal

na salitâ

upang kunin

o nakawin

ang anumang

mayroon ka

paano kung

ninakawan

na'y ang kaban

nitong bayan

hay, ang masa

ang kawawa

panlolokong

di halatâ

mandaraya

walanghiya

budol-budol

tusong ulol

walang gutom

ang pusakal

bulsa't mukha'y

anong kapal

ingat kayo

sa budol gang

at labanan

ang budol gang

- gregoriovbituinjr.

03.31.2025

* batay sa ulat sa pahayagang People's Journal, Marso 31, 2025, tampok na balita (headline) at pahina 2

Manggagawa ang lumikha ng pag-unlad

MANGGAGAWA ANG LUMIKHA NG PAG-UNLAD

habang lulan ng bus ay nakita ko

yaong mga nilikha ng obrero:

ang mga gusaling nagtatayugan

mga tulay, paaralan, lansangan

na pawang ginawa ng manggagawa

maging ng mga kontraktwal na dukha

lumikha ng gusali ng Senado,

Simbahan, Malakanyang at Kongreso

nasaan ang kanilang kinatawan

sa parlamento, sa pamahalaan

bakit pulitikal na dinastiya

yaong mga naluklok, at di sila

Manggagawa Naman! ang aming sigaw

obrerong nagpapawis buong araw

at gabi upang bayan ay umunlad

at bansa ay patuloy na umusad

upang masa'y di manatiling lugmok

upang mawala ang pinunong bugok

upang palitan ang sistemang bulok

sina Leody at Luke ay iluklok

- gregoriovbituinjr.

03.31.2025

#21 Ka Leody De Guzman para Senador

#25 Atty. Luke Espiritu para Senador

* mapapanood ang bidyo sa kawing na: https://www.facebook.com/share/v/18pLAckmcr/ 

Rotinaryo

ROTINARYO

ayoko nang magpaabot ng alas dose

upang matulog kundi alas-dyes ng gabi

upang diwa'y maipahinga ng mabuti

pati na puso't katawan upang umigi

pagkat madalas magising ng alas-kwatro

iihi lang, pipikit hanggang alas-singko

di na makatulog at babangon na ako

upang isulat ang isang tula o kwento

kahit paano ang tulog ko'y pitong oras

upang katawan ay makabawi't lumakas

maya-maya, mag-eehersisyo't lalabas

bibili ng dyaryo, pandesal, lugaw, sopas

at pritong isda para sa alagang pusa

ang agahan ko'y pagbabasa ng balita

kung walang lakad, maglalaba munang sadya

kung may rali, sa kalsada na'y nakahanda

sa tula kong ito'y kanilang malalaman

ang rotinaryo ng aktibistang Spartan

kaya kung may pakana sila at gagawan

ako ng masama, madaling madali lang

- gregoriovbituinjr.

03.31.2025

Ang labada ni mister

ANG LABADA NI MISTER

bilin ni misis, maglaba ako

kaya di ko dapat kalimutan 

ang sa akin ay biling totoo

na agaran kong gagawin naman

ang labada'y agad nilabhan ko

panty, bra, blusa, medyas, pantalon

kumot, sweater, kamiseta, polo

punda ng unan, brief, short na maong

bilin niya'y agad sinunod ko

ganyan tayo, di nagpapabaya

di gaya sa komiks ni Mang Nilo

na naging flying saucer ang batya

salamat sa komiks sa Pang-Masa

dyaryong sa tuwina'y binibili

komiks man ay nagpapaalala

kaya sa Pang-Masa'y nawiwili

- gregoriovbituinjr.

03.30.2025

- komiks mula sa pahayagang Pang-Masa, Marso 28, 2025, p 7

Meryenda

MERYENDA

meryenda ko'y pandesal at tsaa

habang may naninilay tuwina

na samutsaring paksa ng masa

na sinusulat ko kapagdaka

madaling araw, nananaginip

ngayong umaga'y may nalilirip

mga isyung aking halukipkip

at solusyong walang kahulilip

lipunang makatao'y pangarap

nang dukha'y makaahon sa hirap

na asam na ginhawa'y malasap

at maibagsak ang mapagpanggap

kayrami pang tulang kakathain

mga kwento't isyung susulatin

pati nobelang pangarap gawin

ay palagiang iniisip din

tara, magmeryenda muna tayo

habang nagpapalitan ng kwento

halina, at saluhan mo ako

kahit payak ang meryendang ito

- gregoriovbituinjr.

03.30.2025

Tatlong magkakapatid, magkayakap na nasunog

TATLONG MAGKAKAPATID, MAGKAYAKAP NA NASUNOG

tuwing Marso ay Fire Prevention Month subalit
bago magtapos ang Marso ay tatlong paslit
ang namatay sa sunog nang magkakayakap
kung ako ang ama'y tiyak di ko matanggap

mga batang edad tatlo, apat at anim
ang namatay sa sunog, talagang kaylagim
magkakapatid silang may kinabukasan
subalit tinupok ng apoy ang tahanan

ay, bakit nangyari ang kalagayang ito?
anang ulat, ama't ina'y nasa trabaho
nang magkasunog ikasiyam ng umaga
nang tatlong magkakapatid ay nadisgrasya:

Sachna Lexy, Razan Kyle, at Athena Lexy
doon sa Barangay Mambaling, Cebu City
mga pangalang di dapat makalimutan
paalala sila na ating pag-ingatan

at huwag basta iwan yaong ating anak
nang sila lang sa bahay nang di mapahamak
kung may napag-iwanan lang na responsable
sa komunidad, baka di iyon nangyari

- gregoriovbituinjr.
03.30.2025

* ulat ng Marso 30, 2025 sa pahayagang Bulgar at Abante Tonite, tampok na balita (headline) at pahina 2

* 𝗠𝗮𝗿𝗰𝗵 was declared as “𝗙𝗶𝗿𝗲 𝗣𝗿𝗲𝘃𝗲𝗻𝘁𝗶𝗼𝗻 𝗠𝗼𝗻𝘁𝗵” by virtue of Proclamation No. 115-A, s.1966 which promotes consciousness about safety and accident prevention. On the other hand, Proclamation No. 360, s.1989, proclaimed this month as “𝘽𝙪𝙧𝙣 𝙋𝙧𝙚𝙫𝙚𝙣𝙩𝙞𝙤𝙣 𝙈𝙤𝙣𝙩𝙝” that disseminates campaigns on burn prevention and to enhance education in all phases of burn cases. mula sa kawing na https://web.nlp.gov.ph/fire-prevention-month/

7.7 lindol sa Myanmar at Thailand, 1K patay

7.7 LINDOL SA MYANMAR AT THAILAND, 1K PATAY

kayraming gumuhong gusali

nasa sanlibo ang nasawi

sa magnitude seven point seven

na lindol sa Myanmar at Thailand 

dal'wang libo't apat na raan

ang naulat na nasugatan

magnitude six point four aftershock

pa'y talagang nakasisindak

nagpapatuloy pa ang rescue

operation baka may buhay

pang natatabunan ng lupa

o pader ng mga gusali

anumang kaya'y ating gawin

nang mga buhay pa'y sagipin

kung kakayanin, mag-ambagan

nang nalindol ay matulungan

at ipadala sa ahensyang

natalagang magbigay-tulong

tulad sa mga na-Yolandang

buong mundo yaong tumulong

- gregoriovbituinjr.

03.30.2025

* ulat mula sa pahayagang Abante, Marso 30, 2025, tampok na balita (headline) at pahina 3

Pumatay na ngunit di ikinulong!

PUMATAY NA NGUNIT DI IKINULONG!

grabeng balita, may krimen na naman

dahil sa make-up na di pinahiram?

dahil doon, kaklase na'y pinaslang?

pumatay dahil sa make-up na iyan?

Grade 8, tinodas ng klasmeyt sa klasrum

bakit nga ba nangyayari ang gayon?

nadakip naman ang suspek na iyon

ngunit sa piitan ay di nakulong

hanggang Bahay Pag-asa lang ang bading

dalagitang biktima'y nasawi rin

binully, tinutukan ng patalim

pinagsasaksak ng bading na praning

may mental health problem nga ang kriminal

baka dapat dalhin siya sa Mental

balitang ito'y nakatitigagal

kung ako ang tatay ay mangangatal

mga pamilya'y talagang luluha

kung Mental Health Act ay walang nagawa

nang mapigil ang krimeng nabalita

dapat batas pa'y patataging sadya

- gregoriovbituinjr.

03.29.2025

* ulat mula sa pahayagang Pang-Masa, Marso 28, 2025, tampok na balita (headline) at pahina 2

* Republic Act No. 11036 - An Act Establishing a National Mental Health Policy for the Purpose of Enhancing the Delivery of Integrated Mental Health Services, na mas kilala ring Mental Health Act of 2018

Mula World #140, umangat na sa World #75 si Alex Eala

MULA WORLD #140, UMANGAT NA SA WORLD #75 SI ALEX EALA

taaskamaong pagpupugay kay Alex Eala

mula sa World Number One Hundred Forty, umangat na

siya sa ranking, World Number Seventy Five na siya

dahil sa panalo sa mga nakalaban niya

aba't tatlong Grand Slam Champion ang kanyang tinalo

kasama doon ang World Number Five at World Number Two

nasa Top Four sa semifinals, humanga ang mundo

siya'y isang inspirasyon sa mga Filipino

ipakita mo pa, Alex, ang bilis mo at husay

ipakita mo pa ang galing ng atletang Pinay

ipinagbubunyi namin ang bawat mong tagumpay

maging kampyon ka sa mundo sana'y aming masilay

sa mga nagawa mo para sa bayan, salamat

kaya, O, Alex Eala, isa ka nang alamat

mga susunod na henerasyon ay mamumulat

susunod sa yapak mo, muli, maraming salamat!

- gregoriovbituinjr.

03.29.2025

* ulat mula sa pahayagang Abante Tonite, Marso 28, 2025, p.8

Nakaabang na sa pridyider si Alaga

NAKAABANG NA SA PRIDYIDER SI ALAGA

hanap ay pagkain sa pridyider o sa ref

o sa refrigirator, at di sa referee

ang aming alagang galing lang sa pag-idlip

na dito sa amin ay talagang nawili

dahil nawiwili ring kaming mag-alaga

kay Alaga, may kakain ng tira-tira

lalo na't may nagtatago rin ditong daga

at bubuwit na dapat ay mahuli niya

sa araw-gabi'y nagtitira ng pagkain

minsan, sabay kaming kumain ng hapunan

sa umaga ay madalas tulog, antukin

sa gabi, si Alaga'y pagkasigla naman

pagdating ko, pridyider ay bubuksan agad

si Alaga'y nakaabang sa pagbukas ko

agad bigay ko'y pritong isda niyang hangad

lalo't masaya kaming siya'y naririto

- gregoriovbituinjr.

03.29.2025

* mapapanoood ang bidyo sa kawing na: https://www.facebook.com/share/v/15tiNupCdw/ 

Mabuhay ang Letran sa panalo

MABUHAY ANG LETRAN SA PANALO

kahit wala na sa eskwelahan

suportado ang laban ng Letran

mula noong hayskul hanggang ngayon

sa laro nila wala man doon

kaya Arriba Letran! ang hiyaw

upang sila'y maging matagumpay

anumang laro, kahit basketball

chess, tennis, track and field, at volleyball

ako'y isang simpleng tibak lamang

na sa Letran ay napapabilang

na noong hayskul doon nagtapos

kaya ako'y taga-Intramuros

na sa NCAA naglaro rin

atleta noong hasyskul pa man din

track and field ang laro ko talaga

sa Rizal Memorial Stadium pa

kaya pag nabasa sa balita

ang laro ng Letran, ako'y hanga

ang pagsuporta ko'y sadyang buo

ngayon man ay wala akong luho

- gregoriovbituinjr.

03.28.2025

* ulat mula sa pahayagang Abante Tonite at Pilipino Star Ngayon, Marso 28, 2025

* NCAA - National Collegiate Athletics Association

Tennis great Nadal, saludo kay Alex Eala

TENNIS GREAT NADAL, SALUDO KAY ALEX EALA

matapos nitong talunin si Iga Swiatek

pinuri ni Rafael Nadal si Alex Eala

sabi ni Nadal, "We are extremely proud of you, Alex."

anya, "What an incredible tournament! Let's keep dreaming!"

mensahe sa social media ni Nadal kay Alex na

nagsanay sa Rafael Nadal Tennis Academy

sa Mallorca, malaking isla sa bansang Espanya

maganda iyong papuri ng isa sa The Big Three

nina Nadal, Roger Federer at Novak Djokovic

na nangungunang tennis player na kalalakihan

kami rin sa Pinas, nagpupugay sa iyo, Alex

tunay kang inspirasyon para sa kinabukasan

ang hiyaw nga namin, Alex, mabuhay ka, mabuhay!

sa larangan ng tennis ay ipinakitang husay

- gregoriovbituinjr.

03.28.2025

* ulat mula sa pahayagang Pilipino Star Ngayon, Marso 28, 2025, p.12

Alex Eala, tinalo ang World #2

ALEX EALA, TINALO ANG WORLD NO. 2

O, Alex Eala, pagpupugay sa iyo

at talagang tinalo mo ang World Number Two

na nasaksihan ng maraming Pilipino

mula pa sa iba't ibang panig ng mundo

laro mo'y kaygaling, di ka patumpik-tumpik

at pinataob mo si Iga Swiatek

labingsiyam na anyos ka lang ngunit hitik

na sa karanasan, kung pumalo'y kaybagsik

panatilihin mo ang magandang momentum

ang mga tinalo mo'y magagaling doon

tunay ngang alamat ka na at inspirasyon

para sa mga susunod pang henerasyon

tiyak ang pangalan mo'y nakaukit na nga

sa kasaysayan ng isports sa ating bansa

kaya sa iyo'y maraming tumitingala

humayo ka't kampyonato'y kamtin mong sadya

- gregoriovbituinjr.

03.28.2025

* ulat mula sa mga pahayagang Tempo, Pilipino Star Ngayon, at Abante, Marso 28, 2025

Ang tatlo kong daigdig

ANG TATLO KONG DAIGDIG

sa tatlong daigdig umiikot 

ang araw at gabi kong pag-inog:

sa pamilya, sa pakikibaka

at lalo na sa literatura

tutula na sa madaling araw

sa umaga'y bibili ng lugaw,

tsamporado at sampung pandesal

ihahanda sa aming almusal

pag nasok sa trabaho si misis

ako naman ay tutungong opis

o kaya'y sa rali sa lansangan

gagampan ng tungkulin sa bayan

pamilya naman kapag umuwi

sanaysay at tula pag naglimi

aktibismo man ang nasa dibdib

ang pag-irog sa pamilya'y tigib

magbabasa ng nabiling aklat

magninilay at may isusulat

palipat-lipat, papalit-palit

sa tatlo kong mundong magkalapit

- gregoriovbituinjr.

03.28.2025

Pagpopropaganda versus seguridad?

PAGPOPROPAGANDA VERSUS SEGURIDAD?

manunulat, makata, kwentista, propagandista

iyan ang buhay ko bilang aktibistang Spartan

paggawa ng dyaryo, ng polyeto't editoryal pa

ginagawa ko ang trabaho't misyon ng lantaran

propagandista'y nagpapalakas ng kalooban

pag di mapakali sa problema't isyu ang masa

pag negatibo ang nasa isip ng kababayan

moral nila'y patataasin ng propagandista

ngunit anang kasama, isipin ang seguridad

tama naman siya, at baka ako'y mapahamak

at huwag ipakilala ang iyong identidad

tama siya, upang ako'y di ilugmok sa lusak

security officer at propagandista'y iba

ng gawain, isa'y itago ang pagkakilanlan

propagandista'y di maiwasang magpakilala

misyon ko'y ipahayag ang adhikain sa bayan

sa tula't dyaryo pa lang, nalantad na ang sarili

ngunit maaari namang nom de plume ang gamitin

ang propagandista'y nagsasalita rin sa rali

na tindig ng manggagawa sa isyu'y sasabihin

ingat din, para sa seguridad nang di ma-redtag

salamat sa inyong payo sa mga tulad namin

datapwat ang bawat salitang ipinahahayag

ay aming misyon, ilantad ang bawat simulain

- gregoriovbituinjr.

03.27.2025

Alex Eala, dehado raw kay World #2 Iga Swiatek

ALEX EALA, DEHADO RAW KAY WORLD #2 IGA SWIATEK

may ilang nagsabi, anang ulat sa dyaryo

na pambato nating si Alex ay dehado

lalo't makakalaban niya'y World Number Two

na si Swiatek, siya ba'y mananalo?

palagay ko si Alex pa ang magwawagi

kung kanyang momentum ay mapapanatili

matitinding manlalaro'y kanyang ginapi

mananalo siya't makakamit ang mithi

sige, Alex Eala, gawin mo ang kaya

kami rito'y iniidolo ka talaga

ang pangalan ng bansa'y dala mo tuwina

pagpupugay, mabuhay ka, Alex Eala!

ang World Number Two ay iyo nang pataubin

ipakita sa mundong Pinay ay kaygaling

- gregoriovbituinjr.

03.27.2025

* ang sanligan o background ay mula sa ulat sa pahayagang Abante at Bulgar, Marso 27, 2025

Bala, balat, balato

BALA, BALAT, BALATO

hilig kong maglaro ng salita

tulad ng BALA, BALAT, BALATO,

ITA, KITA, KITAM na kataga

tingni ang ALAY, MALAY, MALAYO

iba pa rin ang salitang tugma

na tulad ng PINTO, GINTO, HINTO

na madalas magamit sa tula

gaya nitong GUHO, BUHO, LUHO

dagdag-titik sa bawat salita

kaya tuloy nagmistulang laro

tila pagpipilipit sa dila

o tongue twister na ating nahango

pamagat nitong tula'y suriin

ang balato ba'y bala o balat?

namnamin kumbaga sa pagkain

at kayrami mong madadalumat

- gregoriovbituinjr.

03.26.2025

Ang berdugo'y di magiging bayani

ANG BERDUGO'Y DI MAGIGING BAYANI

tila nais palabasin ng kanyang anak

na kung uuwi'y baka mamatay sa tarmak

baka mapagaya kay Ninoy sa paglapag

ng eroplano, baka siya'y mapahamak

iyan ang laman ng mga ulat sa dyaryo

naging dilawan na ba ang bise pangulo?

idinamay si Ninoy, baka magkagulo?

magiging bayani ba ang isang berdugo?

gayong may atas paslangin ang libong Pinoy

ngayon, ikinukumpara siya kay Ninoy

baka mga napaslang, sa hukay managhoy:

"hoy! si Ninoy nga'y huwag ninyong binababoy!"

dating Pangulo'y kay Ninoy ikinumpara

ano? hay, nakakaumay, maling panlasa

dahil sa kaso'y nagbabalimbingan sila

parang niyakap nila ang diwa ng Edsa

sa tindi ng kaso, crime against humanity

di makababalik, iyan ang mangyayari

umiyak man ng dugo, kahit pa magsisi

di siya isang Ninoy, di siya bayani

- gregoriovbituinjr.

03.25.2025

* mula sa ulat ngayong araw sa pahayagang Pilipino Star Ngayon, Bulgar at Abante

Makasaysayang panalo ni Alex Eala

MAKASAYSAYANG PANALO NI ALEX EALA

sa larangan ng isports, sakalam talaga

ang ating kababayang si Alex Eala

Kanang si Madison Keys pinataob niya 

kaya bansa'y ipinagmamalaki siya!

unang pinataob ay pawang may number five

si Katie Volynets, world's number seventy five

Jelena Ostapenko, world's number twenty five

at ngayon ay si Madison Keys, world's number five

labingsiyam na anyos pa lang nang magwagi

ang kanyang mga panalo'y kapuri-puri

maging world champion sa tennis ang kanyang mithi

sana kalusugan niya'y mapanatili

kami rito, Alex, sa iyo'y nagpupugay

pinakita mo sa mundo ang iyong husay

pinakita sa iba ang lakas ng Pinay

kaya hiyaw namin, mabuhay ka, mabuhay!

- gregoriovbituinjr.

03.25.2025

* ulat ng Marso 25, 2025, mula sa pahayagang Abante, Pilipino Star Ngayon, at Pang-Masa

Careless ba kaya niya iniwan?

CARELESS BA KAYA NIYA INIWAN?

sa pamagat pa lang, alam mong iiwan mo

"Liza Soberano explains why she left Careless,

reveals new management", sa Caremore kaya ito?

iwan mo kung careless, bakit ka magtitiis?

bakit ba Careless imbes Careful ang pangalan

ng talent agency na pinasukan dati

pumokus na raw sa musika o awitan

imbes doon sa pagiging talent agency

subalit di ako interesado roon

kundi bakit pangalan ay Careless talaga

negosyo't pagkita ng pera lang ang layon?

o careless ang danas sa nasabing ahensya?

nakapokus daw ang Careless sa Pilipinas

habang nais ni Liza'y magpuntang Hollywood

iyan ang sinasabi sa ulat ng pantas

si Liza'y nais sa Hollywood mapanood

- gregoriovbituinjr.

03.25.2025

* litrato mula sa Philippine Star fb page

Ang pito kong aklat ni Ligaya G. Tiamzon Rubin

ANG PITO KONG AKLAT NI LIGAYA G. TIAMZON RUBIN

Maikling sanaysay at tula ni Gregorio V. Bituin Jr.

Nakabili ako ng pitong aklat ng manunulat na si Ligaya Tiamzon-Rubin sa Philippine Book Festival 2025. Ang nakatutuwa rito, tigsisingkwenta pesos ang bawat isa. Kaya P350 lahat ito (P50.00 x 7 = P350.00).

Ikalawa, nakakatuwa dahil anim sa pitong aklat ang tungkol sa Angono, Rizal. Dahil minsan na rin akong tumira at nagbahay sa isang lugar sa Angono, sa Mahabang Parang, nang halos anim na taon.

Baguhang staff pa lang ako ng pambansang samahang Kongreso ng Pagkakaisa ng Maralitang Lungsod (KPML) nang tumira ako roon, dahil isa sa mga lider ng KPML, si Ka Joel na nasa kalapit na barangay na sakop ng Teresa, Rizal, ay kinupkop ako, at doon na rin nagsimulang mag-organisa ng maralita. Bandang taon 2002 hanggang 2007 ako naroon.

Nawala lang ako sa Angono dahil sa paghihiwalay ng grupong Bukluran ng Manggagawang Pilipino (BMP) at ng grupong Partido Manggagawa (PM). Ang KPML, kung saan ako staff, ay pumanig sa BMP, habang ang lider ng KPML na si Ka Joel, ay napunta sa PM.

Kilala ko na noon pa si Ligaya Tiamzon Rubin dahil nagsusulat siya sa magasing Liwayway na hilig kong bilhin dahil sa mga nobela, komiks, maikling kwento at tulang nalalathala rito. Kumbaga, ito lang ang magasing pampanitikan na nalalathala sa wikang Tagalog.

Kaya nang makita ko ang mga aklat ni Rubin sa booth ng UST Publishing House ay binili ko muna ang apat na aklat, at sa ikaapat na araw ang tatlong aklat. Una kong nabili ang Dangal ng Angono Book 1, ang Angono, Rizal Book 4 - Sa Mata ng mga Iskolar ng Bayan, ang Angono, Rizal Book 6 - Pagtatala ng Gunita, at ang Angono, Rizal Book 7 - Doon Po sa Amin. Sa huling araw ng festival ay nabili ko naman ang Angono, Rizal Book 8 - Lahat ay Bida, ang Angono, Rizal Book 19 - Itanghal ang Bayan, at Paano Nagsusulat ang Isang Ina.

Ang bawat aklat ay may sukat na 6" x 9" na may kapal na kalahating dali, at naglalaro sa humigit kumulang 250 pahina bawat libro. Bawat aklat na Angono, Rizal ay katipunan ng akda ng iba't ibang manunulat, na tinipon ni Ligaya Tiamzon-Rubin, kasama ang kanyang mga sinulat.

Habang ang aklat na Paano Nagsusulat ang Isang Ina ay katipunan ng mga sanaysay ni Gng. Rubin. At ang sanaysay na Paano Nagsusulat ang Isang Ina ay nagkamit ng ikalawang gantimpala sa sanaysay sa Don Carlos Palanca Memorial Awards for Literature noong 1981. Naroon din sa aklat na iyon ang isa niyang sanaysay sa Ingles na may pamagat na Turning Back and Moving Forward na nanalo naman ng Third Prize sa Essay sa Don Carlos Palanca Memorial Awards for Literature noong 1980.

Nais kong basahin ang mga sulatin hinggil sa Angono dahil minsan na rin akong naging anak nito.

LIGAYA TIAMZON RUBIN

minsan na rin akong nanahan sa Angono, Rizal

bilang istap ng isang samahan ng maralita

doon ay halos anim na taon akong tumagal

na dahil sa problemang pangsamahan ay nawala

kaya nang sa Philippine Book Festival makita ko

ang mga librong hinggil sa Angono'y binili na

di na ako nagdalawang isip na bilhin ito

lalo't napakamura, limampung piso ang isa

maraming salamat, Ligaya G. Tiamzon Rubin

sa mga sulatin mong pamana sa sambayanan

nang isinaaklat mo ang iba't ibang sulatin

sinulat mo ang tungkol sa lupa mong tinubuan

tunay na inspirasyon ka't mga akda'y kayhusay

tangi kong masasabi'y taospusong pagpupugay!

03.24.2025